CEBU, Philippines – Mapangahason ang Cebu Blue Marlins (CBM) tankers nga makahagpat og bulawang medalya sa ilang pagsalmot sa 1st G-League National Long Course Age-Group Swimming Tournament nga gikatakda karong Hulyo 23-26 didto sa Trace Aqua Sports Complex sa Los Baños, Laguna.
Dul-an sa 90 ka koponan ang mopartisipar sa upat ka adlaw nga kompetisyon nga salmotan sa kapin sa 600 ka swimmers lukop nasud.
Sa 23 ka swimmers kinsa napili atol sa Visayas Selection niadtong Mayo 16 didto sa Negros Occidental, ang CBM mopadala lamang og 12 tungod sa kakulian pinansiyal.
Ang 12 ka swimmers naglakip nilang Lyh Ann Navarro ug Anthony Linn Navarro sa Cebu Eastern College, Kaitlin Danielle Capacio ug Madelin Capacio sa University of San Jose-Recoletos, Trina Cañeda, Noel Cañeda, Paula Abigail Vega, Michael David Vega ug Pierre Niño Baguio (University of Cebu), Karen Mae Indaya sa Labangon Elementary School, Danielle Mae Ballesteros sa University of Southern Philippines Foundation ug Michael Ichiro sa FBC Christian School.
“We are well-prepared for this event because we started our rigid practice since April and all of them really improved their personal-best time,” matud pa ni CBM coach Rolando Alvarez. – BANAT NEWS