CEBU, Philippines – Agi’g pagtimaan sa ilang ikaduhang anibersaryo isip highly- urbanized city, ang kagamhanan sa dakbayan sa Lapu-Lapu mopahigayon og Great Lapu-Lapu Run karong Hulyo 26 nga manukad diha sa bag-ong gitukod nga Hoopsdome sa barangay Gun-ob.
Ang lumba gibahin sa tulo ka kategoriya -- 3K Fun Run, 6K Run ug ang 20K half marathon nga mulibot sa walo ka mga barangay sa Lapu-Lapu.
Matud pa ni Hembler Mendoza, general manager sa Waterfront Hotel Mactan ug chairman sa Lapu-Lapu Sports and Events Bureau (LLSEB), nga nahuna-hunaan nila ang pagpasiugda sa maong kalihukan aron mailhan og maayo sa mga turista ang dakbayan sa Lapu-Lapu.
Giawhag usab ni Mendoza ang ubang mga hotel ug restaurant sa siyudad nga mopadala sa ilang mga delegado alang sa maong kalihukan.
Aron pagdugang og kolor sa maong lumba, si Lapu-Lapu City First Lady Paz Radaza nagkanayon mopahigayon sab siya og cheerdance ug drum and bugle competitions sa mga barangay nga maagian sa mga runners.
Ang half-marathon maoy unang proyekto sa LLSEB. Laing sports events nga plansahonon sa LLSEB mao ang golf, beach volleyball, triathlon, shooting, duathlon ug uban pa.
Ang deadline sa registration hangtod lamang sa Hulyo 23. Ang registration fee nagkantidad og P150 libre na ang singlet, lootbag ug snack.
Ang registration areas nahimutang sa Waterfront Hotel Mactan, Cebu Grand Hotel ug Lapu-Lapu City Hall. – BANAT NEWS