CEBU, Philippines – Ang Cebu City National Darts Open, ang labing dakung darts tournament sa Sugbu sukad niadtong 2004 nga nagtanyag og P100,000 nga ganting salapi, mo-ulbo karon diha sa Baseline Sports Center.
Pipila ka mga banggiitang darters dinhi sa nasud ug ingon man mga hinog ug linghod nga mga magduduwa ang mopakita sa ilang abilidad uban ang paglaum nga modaog.
Ang mga dekalibreng darters nga mosalmot ning tulo ka adlaw nga kompetisyon naglakip ni Ian Perez, Boie Parfan, Lawrence Ilagan, Gale Boy Giongson, Jojo Barellano, Bert Lozano ug Arvy Briones.
Ang Cagayan de Oro, Davao, Agusan, Butuan, Aklan, Iloilo, Bacolod, San Carlos City, Cotabato, Pasay, Navotas, Cainta ug Tanjay mopadala sab sa ilang mga pambato.
Ilang harungon ang mga tang-ang darters sa Sugbu sama nilang Roy Laude, Itong Badayos, Jerous Ponce, Winnie Ocañada, Lando Cadorna, Molet Patunob, Noli Aporado, Jet Ouano ug ang haring gangis sa CHEDA nga si Bert Colong.
Gawas sa ganting salapi, ang top performers makaangkon sab og puntos alang sa ilang National Darts Federation of the Philippines (NDFP) rankings. – BANAT NEWS