CEBU, Philippines – Mipabuto og 30 puntos si Mike Cinco aron pangulohan ang Sun & Rain pagposte og 98-90 nga kadaugan batok sa Liquid Tile sa pagsugod sa 3rd United Architects Basketball Club (UABC) season nga giuloha'g "2nd Davies Cup" didto sa CEC gym.
Si Cinco milangkat sab og pito ka rebounds, upat ka steals, duha ka assists ug duha sab ka blocks, samtang si Jun Villacorta mipupo og 26 puntos uban ang 10 ka rebounds, walo ka steals, unom ka assists ug duha ka blocks alang sa maong kadaugan.
Ang Sun & Rain miugbok og 1 ka triples, upat niini gikan ni Rolan Paolo Alberto, kinsa miabuno og 19 puntos.
Ang naparot nga Liquid Tile gipangulohan ni Mark Capili, kinsa milansang og 27 puntos, gisundan ni Erik Perez sa iyang 19 puntos. Sila si Elmer Laguna ug Jay Ramores nagkumboya og 22 puntos.
Sa main game, ang Powerfloor miabli sa tabil sa pagpanalipod sa ilang titulo pinaagi sa pagpukan sa Bio-Fresh sa iskor nga 70-66.
Ang finals MVP sa miaging season nga si Jay-R Decatoria maoy nidominar sa shaded territory nga nakapahimo niyang player of the game sa iyang 19 puntos uban ang unom ka rebounds, duha ka assists ug duha ka steals, apan si Klein Baladya maoy topscorer sa Powerfloor sa iyang 21 puntos.
Si Oliver Tan miabuno og 14 puntos, samtang si Buck Sia mikawot og 21 puntos.
Puntos Matag Usa
Unang duwa:
Sun & Rain (98) – Cinco 30, Villacorta 26, Alberto 19, Partosa 15, Hunrada 5, Branzuela 3
Liquid Tile (90) – Capili 27, Perez 19, Laguna 12, Ramodes 10, Abella 8, Jugalbot 6, Suico 4, Dy 2, Hisula 2
Ikaduhang duwa:
Powerfloor (70) – Baladya 21, Decatoria 19, Tan 14, Sia 12, Cuizon 4
Bio-Fresh (66) – Matunog 20, Villarin 11, Sesbreño 10, Tan 9, Cabigas 6, Osmeña 4, Mantos 4, Zamora 2 – BANAT NEWS