CEBU, Philippines – Mga dekalibreng tennis players ang magsangka sa pagsikad sa Skygo-La Paloma Tennis Club (LPTC) Classic 2009 "Search for King of The Court" nga buksan ugma diha sa La Paloma Tennis Court, Brgy. Tisa, ning syudad.
Ang torneyo gibahin sa duha ka kategoriya -- men's singles open ug men's doubles Inter-club.
Si LPTC chairman Engr. Lito Valenzona nagkanayon atol sa press conference kagahapon didto sa LPTC headquarters sa La Paloma, nga adunay 32 ka teams ang nipadayag sa ilang partisipasyon.
Mitambong sab sa press conference ang club president nga si Lanny Orozco, vice-chairman Engr. Michael Balazo ug event director Domingo Andoyo.
Sila si Michael Quiñones, Niño Siso, Bo Alburo, Cyril Camporedondo Jr. ug Francis Largo, pipila lamang sa mga notadong magduduwa nga mopakita'g aksiyon.
Ang kanhi 2006 M. Lhullier Tennis Cup champion nga si Jojo Ramil moapil sab sa maong kompetisyon.
Ang makampiyon sa matag kategoriya makadawat og P5,000, ang second placer makadawat og P2,500 ug ang third placer makadawat og P1,000.
Ang tennis tournament gipasiugdahan sa LPTC Tennis Club uban sa suporta sa Uniherb Philippines ni Atan Guardo, Chris Sports, Tobys Sports, Gillamac Marketing, NG Khai Development Inc., San Miguel Beer Inc., Pagcor, Dendramil Merchandise ug Skygo Motorcycle. – BANAT NEWS