CEBU, Philippines – Nilampos ang Carcar pagharos sa duha ka duwa batok sa Boljoon, 92-75 aron pagsakmit sa Inter-town championship sa 1st Mayor Edsel Galeos Cup 2009 summer basketball tournament didto sa Diosdado Macapagal Sports and Cultural Center sa Argao, Cebu.
Sa sayo pa, ang Oslob mipukan sa Sibonga sa iskor, 105-94 aron pag-angkon sa ikatulong dapit.
Sa Inter-zonal category, ang Poblacion-C milubong sa Firebulls, 102-63 aron pagpuwersa ngadto sa tinaktakay nga duwa sa ilang kaugalingon “best-of-three” final series.
Ang Carcar mipahimos sa ilang kainit sa second quarter aron pagposte og 18 puntos nga bentaha sa halftime, 54-36. Mitubo pa ang labaw ngadto sa 22 puntos human sa third period, 78-56 ug wala na gyud nila hatagi og higayon nga makasikit pa ang Boljoon.
Ang kanhi-USC Warrior Danny Infantado ug si Clifford Bargamento parehong mi-iskor og 16 puntos aron pangulohan ang Carcar, samtang sila si Klent Florido ug TJ Napolitano nagkumboya og 26 puntos.
Dobleng kadaugan ang naangkon ni Florido kay siya man ang nidaog sa MVP award. Otomatik sab siya nga naapil sa mythical five uban nilang Donnel Solon, Gilbert Andujar, Infantado ug Napolitano.
Si Andujar maoy nangulo sa Boljoon pinaagi sa iyang 19 puntos.
Puntos Matag Usa
Unang duwa:
Poblacion-C (102) - Pillaso 23, Figuez 18, Matralo 18, Lopez 13, Puerto 12, Alviso 12, Tapere 6, Vega 3, Crodua 2
Firebulls (63) - Salazar 17, Puerto 17, Mamalias 14, Oyanguren 5, Alburo 4, Papalid 3, Amarillo 2, Alviola 1
Ikaduhang duwa:
Carcar (92) - Bargamento 16, Infantado 16, Florido 14, Napolitano 12, Solon 11, Tabar 10, Macasero 8, Del Rosario 3, Alcover 2
Boljoon (75) - Andujar 19, Tanato 10, K. Getubig 9, Medida 9, Estela 8, Alibango 6, B. Binagatan 5, Antiporta 5, Nicanor 2, R. Getubig 2 – BANAT NEWS