CEBU, Philippines – Ang Firebulls mipukan sa Simples, 86-78 aron pag-abante sa finals sa Inter-Zonal category sa Mayor Edsel Galeos Cup 2009 basketball tournament didto sa Diosdado Macapagal Sports and Cultural Center sa Argao.
Maluyahon ang Firebulls pagsugod, apan ilang nalupig sa scoring ang Simple Minds sa final period, 27-19 aron pagsakmit sa labaw sa iskor nga 63-61 ug sukad niadto ila na nga nakontrolar ang duwa.
Bitbit ang 4-0 card, ang Firebulls nakakuha og automatic entry sa final.
Si Ranelo Mamalias mi-iskor og 31 puntos aron pangulohan ang Firebulls, samtang si Ritchie Gayrama mao sab ang nangulo sa Simple Minds pinaagi sa iyang 17 puntos.
Sa laing duwa sa Inter-Zonal category, ang Tulic-Lamacan mikulit og daog human gipilde ang Cobalbotal, 84-80. Ang Tulic-Lamacan nagtangag og 3-2 nga baraha, samtang ang Cobalbotal nagbitbit og 2-3 nga baraha.
Sa Inter-Town division, ang Boljoon ubos sa pagtimon ni ex-CIT Wildcats Anjo Nicanor milubong sa Sibonga sa iskor nga 125-102. Ang duha parehong nagbitbit og 2-1 win-loss records.
Si Bert Andujar mihakot og 40 puntos aron pangulohan ang Boljoon, sila si Resty Getubig ug Nicanor nagkumboya og 39 puntos.
Ang pilderong Sibonga gipangulohan ni Roy Padilla sa iyang 21 puntos, gisundan ni Noel Alima nga adunay 18 puntos. – BANAT NEWS