CEBU, Philippines – Magginukdanay na sab ang mga tang-ang runners sa ipahigayong "Running M.A.D for Wellness" nga mosikad karong Domingo diha sa University of the Philippines Visayas-Cebu College grounds.
Mga bantugang runners dinhi sa Sugbu nga nikompirmar sa ilang partisipasyon naglakip nilang Leizl Lumindas-Getaruelas, Madelyn Carter, John Philip Duenas ug ang managsuong Eugene ug Joel Delposo.
Si Mary Grace De los Santos sa Zamboanga City, nga maoy nanghawod sa Milo Marathon didto sa Cagayan De Oro mosalmot sab aron sukdon ang abilidad sa mga Sugbuanong runners.
Modagan sab si ABS-CBN news anchor Atty. Haidee Acuña, GMA news anchor Jun Veliganio, Sambag I Brgy. Captain Jerry Guardo ug si Brgy. Captain Mary Ann de los Santos.
Ganting salapi ug mga medalya ang madawat sa mga mananaog sa matag dibisyon.
Sa 12K, ang kampiyon makadawat og P3,000, ang second placer makaangkon og P2,000 ug ang third placer mobulsa og P1,000.
Ang top three finishers sa 6K makadawat og P1,500, P1,000 ug P500 matag usa.
Ang lumba gipasiugdahan ni Lahug Brgy. Captain de los Santos sa abag ni race coordinator ug The Freeman sports columnist Raffy Uytiepo, Sportswriters Association of Cebu (SAC) president John Z. Pajes ug kanhi Tinago barangay captain Joel Garganera.
Ang registration nagkantidad og P100 libre na ang singlet. Ang deadline sa registration kutob lamang ugmang adlawa diha sa Sambag I Barangay Hall, Athletes Foot sa Ayala Mall, Holiday Gym and Spa, Waterfront Hotel and Casino ug sa Cebu City Sports Center. – BANAT NEWS