CEBU, Philippines – Gipakuratan sa nagkagidlay nga Viking Haulers ang Heartfelt pinaagi sa pag-iskor og 112-103 nga kadaugan sa F. Llamas Youth Association (FYA) 1st Vice Mayor Mike Rama Cup basketball tournament didto sa Vicente Sotto Memorial Gym sa barangay Punta Princesa, ning siyudad.
Sa ikaduhang duwa, ang Orillaville nidaog pinaagi sa default batok sa Team Jayra, kinsa nitunga nga kulang og players.
Gumikan niini, ang Orillaville nakig-uban na sa Rollyr Boyz sa labing taas nga dapit sa liderato sa managsamang 5-1 win-loss records, samtang ang Jayra nagbitbit og 4-2 nga baraha.
Si Toper Limbaga mibahog og 27 puntos ug si Baeng Medalle midugang og 20 puntos alang sa Haulers, kinsa mihakot og 2-4 nga baraha. Ang kanhi USJ-R Jaguar nga si Giovanni Canceko mi-abuno og 17 puntos sa maong kadaugan.
Ang Heartfelt, kinsa nakaangkon sa ilang ikatulong sunod-sunod nga kapildihan human miposte og 3-0 pagsugod sa liga, gipangulohan ni Tata Laborte 29 puntos, gisundan ni Jeffrey Alob sa iyang 25 puntos.
Puntos Matag Usa
Viking (112) - Limbaga 27, Medalle 20, Canceko 17, Ardon 10, Trinidad 9, Cal 8, Potencioso 6, Aguirre 4
Heartfelt (103) - T. Laborte 29, Alob 25, N. Laborte 13, Abella 12, Rama 12, Basubas 8, Danding 2 – BANAT NEWS