CEBU, Philippines - Nagmaya ang Don Bosco Technology Center (DBTC) human sila misakmit sa ilang double-title sa 2009 CAFC National Inter-Club Football Championship kagahapon didto sa University of San Carlos-Technological Center, Brgy. Talamban, ning syudad.
Human nila gilangkat ang kampiyonato sa boys 10-under niadtong Sabado, ang DBTC nangharus usab sa 14-under class dihang ilang gipukan ang Pomeroy, 5-0.
Si Christian Agot maoy mi-iskor sa DBTC sa firsth half, nagmangtas usab si Valentino Calvo sa final-half, samtang si Junjay Arrizabal mikutlo sa ikalima nilang goal aron hingpit nga masakmit ang korona.
Si Agot mao usab ang gipasidunggan isip “best striker” sa torneyo, si Joseph Mercado maoy nakadawat sa Most Valuable trophy samtang si Rafael de Guzman maoy best goal keeper.
Human sa makauuwaw nga kapildehan sa finals 14-under, namawi ang Pomeroy dihang nidaog sila batok sa Davaoeño booters, 1-0, aron masakmit ang korona sa 17-under division. Si Carlito Abadia maoy bayani sa Pomeroy pinaagi sa iyang winning goal. - Lemuel P. Maglinte (BANAT NEWS)