CEBU, Philippines – Dul-an sa 50 riders ang magpalabwanay sa ilang tagsa-tagsa ka abilidad sa all-Honda One-Make Underbone Race Circuit ugma gikansa alas-8 sa buntag hangtod sa alas-5 sa hapon diha sa Parkmall carpark sa north reclamation area.
Ang kalihukan pormal nga gilusad pinaagi ni OZ Racing president Zandro Fajardo ug chief corporate backer Honda Motorworld general manager Jose Daniel ‘Jonel’ Borromeo kagahapon diha sa Bo’s Coffee sa Parkmall.Mitambong sab sa maong kalihukan si Honda Motorworld area manager Bernardino Yu Vega ug branch manager Alvin Viñalon, OZ Racing marketing director Chad Mascariñas ug Dido Aviles, importer sa FKR motorcycle tires.
Sumala pa ni Fajardo, nga ang karera ugma susama sa miaging OZ Racing Underbone Circuit gawas lang nga ning higayona eksklusibo lamang kini ngadto sa Honda motorcycles.
Libre ang registration niini. Ang nag-unang tulo ka mananaog makadawat og ganting salapi, plake ug uban pa gikan sa mga sponsors.
Ang kompetisyon adunay upat ka kategoriya -- super beginners, beginners, novice open ug expert. – BANAT NEWS