CEBU, Philippines – Mipasidaan si Kenyan trainer Paul Otieno ngadto ni ALA Stable star AJ ‘Bazooka’ Banal nga magbinantayon sa iyang pakigsangka batok ni African ‘Golden Boy’ Mbwana Matumla sa Tanzania, kansang estilo sa pakig-away sama sa nagdahunog nga tidal waves nga lisud kaayong pugngan.
“(Banal) Be watchful. This guy (Matumla) is like a ‘tsunami.’ Unstoppable,” nagkanayon si Otieno atol sa gipahigayong press conference kagahapon didto sa Cebu Grand Hotel.
Si Banal (18-1-1, 15KOs) mohamag ni IBO super flyweight champion Matumla (18-3-1, 10KOs) sa 10-round non-title fight nga maoy event sa “Pagsubok” boxing extravaganza ugma sa gabii diha sa Cebu Coliseum.
Hinuon, si Banal alisto sab nga mibawos sa gibuhiang mga pulong sa African ug nagkanayon nga iyang tinuon nga mapuno sa kargada ang iyang “Bazooka” aron mabuntog sa ‘tsunami’ ibabaw sa ring.
Niangkon si Banal nga buot niyang bawion ang iyang garbo atol sa iyang unang away balik sa Cebu human sa iyang 10th round knockout ngadto ni Panamian Rafael ‘El Torito’ Concepcion sa ilang WBA interim super flyweight championship niadtong Hulyo 27 sa miaging tuig diha gihapon sa Cebu Coliseum.
Kinahanglan nga dag-on ni Banal ang iyang away batok ni Matumla karong Sabado aron mo-away kini sa undercard sa Floyd Mayweather Jr.-Juan Manuel Marquez fight karong Hulyo 18 didto sa Las Vegas.
Sa supporting bouts, sila si ALA mainstays Czar Amonsot ug WBO Youth lightweight champion Jason Pagara parehong makigsangka batok sa mga mangtas nga kaatbang nga pulos nagbitbit og maayong rekord.
Si Amonsot (19-3-1, 11KOs) makigkumbati ni Kenyan Morsis Chule (11-6-2, 8KOs), samtang si Pagara moharong ni Indonesian welterweight titlist Hero Katili, kinsa nipaubos og ensayo ni Jeff Malcolm, kanhi world champion sa Australia nga adunay 100 ka daog diin 36 sa iyang mga biktima pinaagi sa knockout, 27 ka pilde uban ang 11 ka draws sa kinatibuk-an niyang 138 ka career fights gikan 1978 hangtod sa 2002. – BANAT NEWS