CEBU, Philippines – Gitiwasan sa Southwestern University (SWU) Cobras ang undermanned nga Asian College of Technology (ACT) Cyber Knights pinaagi sa pagposte og 67-57 nga kadaugan sa Game-2 aron pag-abante ngadto sa finals sa 1st Vice Mayor Rudy Espinosa Cup basketball tournament didto sa Barba Sports Complex didto sa Toledo City.
Ang Cobras, kinsa mi-iskor sab og 83-55 nga kadaugan sa Game-1 sa ilang best-of-three semifinals, nagpaabot na lang sa resulta sa duwa tali sa CCC-CSD Builders ug Ave Maria Sanctuary Park/USJ-R Jaguars.Ang CSD Builders maoy nakabentaha sa serye sa 1-0.
Human sa dul-an sa usa ka semana nga pahuway, mag-abot na sab ugmang adlawa ang CSD Builders ug ang USJ-R Jaguars aron ilogan ang ikaduhang luna sa finals.
Sa higayon nga makatabla ang Jaguars, ang Game-3 himuon sa Miyerkules ug ang best-of-three championship series duwaon karong Biyernes.
Migamit og maanindot nga opensa ang SWU Cobras aron wanihon ang ACT Cyber Knights bisan pa’g napugngan si Eric Zanoria ngadto sa 10 puntos sukwahi sa iyang 20 puntos nga nahimo sa Game-1. Hinuon, gitubos kini ni Aard Diango aron pangulohan ang SWU Cobras pinaagi sa iyang 21 puntos.
Wala sab kaayo mahuygo si Alfred Belande, kinsa igo lang nakahimo’g tres puntos.
Si Prospito Batiancila, Jr. maoy nangulo sa ACT Cyber Knights sa iyang 19 puntos, gisundan ni Cyril Pontemayor nga adunay 10 puntos.
Ang Espinosa Cup gidumala ni Toledo City Sports Commission chairman ug city councilor Jun Borja. Ang tournament director mao si Estoy Jaranilla ug ang sakop sa technical committee mao si Edwin Dejacto.
Sa Inter-Ballclub, ang CSD Power Builders mipukan sa Blanc Blow sa iskor nga 108-95.
Puntos Matag Usa
SWU (67) - Diango 21, Pacquiao 12, Zanoria 10, Armecin 9, Gallarde 4, Jalandoni 4, Belande 3, Litorja 2, Pria 2
ACT (57) - Batiancila 19, Pontemayor 10, Aparice 8, Valencia 8, Doy 7, Montes 3, Conahap 2 – BANAT NEWS