CEBU, Philippines – Ang duha ka free throws ni Kevin Baruel maoy nakapadaog sa Noypi dihang midaog lang kini og uno punto batok sa SYBA, 48-47 sa midget division sa Our Lady of Lourdes Parish Summer Saya Basketball League didto sa Our Lady of Lourdes Parish Gym.
Ang SYBA ubos nilang Ariane Baluyot ug John Badnes milabaw og otso puntos paghuman sa unang duha ka kuwarter, 28-20.
Sa ikatulong kuwarter, ang Noypi nga gipangulohan ni Brylle Gacho mibawos ug hinay-hinay kining migukod hangtod nga nagtabla ang iskor, 37-all human sa iyang 3-point shot.
Padayon nga nagsinukliay og puntos ang duha ka koponan sulod sa sayes minutos sa final period hangtod nga si Baruel mipasulod sa iyang mahinungdanong itsa sa katapusang tres segundos aron luwason ang Noypi.
Si Gacho maoy topscorer sa Noypi pinaagi sa iyang 11 puntos, gisundan ni Baruel sa iyang otso puntos.
Ang SYBA gipangulohan sab ni Niño Empleo nga mibugha og 13 puntos, gisundan ni Baluyot nga miamot og 10 puntos.
PUNTOS MATAG USA
Noypi (48) - B. Gacho 11, K. Baruel 8, C. Dagoy 8, J. Flores 6, S. Goody 4, M. Husain 5
SYBA (47) - N. Empleo 13, A. Baluyot 10, J. Badnes 8, J. Libre 2, J. Cui 2, R. Baisac 2 – THE FREEMAN