CEBU, Philippines – Mi-abante na ngadto sa second round sa NBA Playoffs ang Cleveland Cavaliers human giharos ang upat ka duwa pinaagi sa paglubong sa Detroit Pistons, 99-78 sa Game-4 sa Eastern Conference playoffs kagahapon didto sa The Palace of Auburn Hills sa Michigan.
Si LeBron James mirehistro na sab og double-double pinaagi sa iyang 36 puntos, 13 ka rebounds ug walo ka assists aron pangulohan ang Cavaliers. Miabag sab si Mo Williams sa maong kadaugan nga mipupo og 24 puntos.
Si Antonio McDyess, kinsa maoy nangulo sa pilderong Pistons, mitabla sa iyang career playoff record nga 26 puntos nga iyang nahimo niadto pang 1998 sa dihang nagduwa pa siya didto sa Phoenix Suns.
Ang Cavaliers nidaog sa Game-1 sa iskor nga 102-84, nausban sa Game-2 sa iskor nga 94-82, gisundan sa Game-3 sa iskor nga 79-68 ug dayon sa Game-4.
Sa laing bahin, nakatabla sa serye, 2-2 ang Chicago Bulls human midaog batok sa Boston Celtics sa iskor nga 121-118 sa double overtime.
Si Derrick Rose kulangan na lang og usa ka assist aron makahimo'g triple double. Si Rose mitali og 23 puntos, milangkat og 11 ka rebounds ug mihimo og siyam ka assists aron pangulohan ang Bulls. Si Ben Gordon mipabuto og 22 puntos lakip na ang triple nga maoy naghatod sa duwa ngadto sa ikaduhang overtime.
Ang pilderong Celtics gipangulohan ni Paul Pierce, kinsa mibahog og 29 puntos, si Ray Allen, kinsa maoy naghatod sa unang overtime pinaagi sa iyang three-point shot sa katapusang 9.8 segundos sa regulasyon, 96-all miamot og 28 puntos, samtang si Rajon Rondo mitampo og 25 puntos. Gawas sa iyang puntos si Rondo milangkat og 11 ka rebounds ug mitunol og 11 ka assists alang sa iyang triple-double.
Didto sa Wachovia Center sa Pennsylvania, Philadelphia, si Hedo Turkoglu mipasulod og crucial three-point shot sa katapusang 1.1 segundo aron luwason ang Orlando Magic gikan sa mga kamot sa Philadelphia Sixers sa iskor nga 84-81.
Sa lain pang duwa, si Yao Ming mi-iskor og 21 aron pangulohan sab ang Houston Rockets pagbuntog sa Portland Trail Blazers sa iskor nga 89-88 didto sa Toyota Center sa Houston, Texas.
Sa kasamtangan, ang Rockets nagbitbit og 3-1 sa series ug nagkinahanglan na lang og usa ka daog aron mo-abante sa sunod hugna. – BANAT NEWS