CEBU, Philippines – Laraw sa Chazyl Mae nga magbinugtong sa ikaduhang dapit sa dihang ilang sangkaon ang Asian College of Technology (ACT) Cyber Knights karong adlawa sa pagpadayon sa 1st M. Lhuillier Kwarta Padala Cup basketball tournament diha sa Tabunok Sports Complex sa Talisay City.
Mag-abot ang Chazyl Mae ug Cyber Knights ni coach Tata Merced sa main game nga gitakda sa alas-8:30 sa gabii human sa pasiunang duwa tali sa 24/7 Convenience Store ug San Remigio Beach Club sa alas-7 sa gabii.
Sa kasamtangan, ang Chazyl Mae nagtabla sa ikaduha nga dapit sa overall standings uban sa Binglens sa managsamang 3-1 win-loss records.
Temporaryong naghari sa liderato ang Ave Maria Sanctuary Park sa ilang 4-0 nga baraha, samtang ang ACT nagbitbit og 2-1 record.
Sa gihapon, ang Chazyl Mae magsandig sa serbisyo ni Jimwell Torion uban nilang Eric Zanoria, Alano Caputolan ug Michael Luga.
Sa laing bahin, ang 24/7 Convenience Store, kinsa nagtinguhang moposte sa ilang ikaduhang daog, magsalig sab sa abilidad nilang Mark Abadia, Vernini Tangarorang ug Ignatius Mark Loyola. Sa pagka karon, ang 24/7 Convenience Store nagtangag og 1-3 win-loss record.
Ang SRBC nga gipangulohan ni Adrian Lao adunay 2-2 nga baraha ug nagtabla uban sa CSD Power Brokers.
Ugma, ang duwa dad-on didto sa Naga Sports Complex diin ang Binglens makigsangka batok sa CSD Power Brokers sa main game sa alas-8:30 sa gabii, samtang ang Salazar Colleges of Science and Institute of Technology (SCSIT) Skyblazers makigbatok sa Perfect Freight sa pasiunang duwa sa alas-7 sa gabii.
Ang Binglens maghangad sa abilidad nilang Jessie Lumantas, Max Delantes ug Michael Almonte, samtang ang CSD Power Brokers timonan nilang Aldrin Ocañada, Jerry Jaca, Jan Montalbo, Danny de los Santos ug Jared Ken Abatayo.
Ang SCSIT wala gihapon makatilaw og daog sa tulo ka duwa, samtang ang Perfect Freight nakatagamtam og daog sa tulo ka duwa. – BANAT NEWS