CEBU, Philippines - Ang mga pambato sa Sugbu, kasagaran niini gikan sa SANCASE Developmental Training Pool ni Fr. Rey Talaugon, mihakot og tulo ka titulo ug mao sab ang gidaghanon sa first runner-up finish sa Bacolod City leg sa 2009 Head Penn Age-Group Tennis Circuit didto sa Noah's Haven tennis courts.
Mikabkab og tulo ka bulawan alang sa Cebu mao sila si Niño Siso, RJ Abarquez ug Jan Godfrey Seno.
Gipaundang ni Siso si Paulo Cansino sa Davao dihang miposte kini og 6-3 nga bentaha sa first set aron paghari sa boys 16 division, apan napukan kini ngadto sa iyang teammate nga si RJ Abarquez, 4-6, 6-1, 8-10 sa boys 18 division.
Ang igsuon ni Niño nga si Sallydine wala buligi og maayong palad ug igo lang niya nakuha ang runner-up trophy sa girls 18-under division. Miyukbo siya ngadto ni Tao Yee Tan, 6-2, 2-3, 13-14 sa kulbahinam nga final showdown.
Sa laing bahin, si Seno mitunol sa ikatulong bulawan sa Cebu human miugkat og 6-2, 6-4 nga kadaugan batok ni Bern Haft sa unisex 10-under final.
Si Fritz Satera, napakyas na sab sa iyang pangandoy nga modaog og titulo dihang gipilde kini ni Paulo Baran sa Bacolod, 2-6, 6-4, 6-10 sa ilang kulbahinam nga championship match sa 14-under category. – BANAT NEWS