CEBU, Philippines - Napulo ka teams ang mosalmot sa ipahigayong F. Llamas Youth Association (FYA) 1st Vice-Mayor Mike Rama Cup nga sugdan karong adlawa diha sa Vicente Sotto Memorial Gym sa barangay Punta Princesa, ning dakbayan.
Ang mga partisipanteng koponan bahinon sa duha ka grupo -- A ug B nga ginsakpan og lima ka teams.
Nahisakop sa Group-A mao ang Viking Haulers, Jayra, Grandeur, Roller Boy ug Orilla Ville, samtang sa Group B mao ang AquaServ-F. Llamas, Kuya Allan, CIIB, Heartfelt ug Park ‘N Go Bakeshop.
Sa dili pa pormal nga sugdan ang duwa, adunay parada sa tanang mga teams uban sa ilang tagsa-tagsa ka muse gikan sa Vicente Sotto gym paingon sa Mc Donald’s F. Llamas sa 1:30 sa hapon ug balik ngadto sa nahisgutang gym.
Usa sa mga highlights sa kalihukan mao ang pagpili og Miss FYA 2009 ug dayon ang exhibition game tali sa Pacman Team nga gipangulohan sa three-point artist nga si Jing-jing Rama ug sa FYA Selection.
Ang torneyo mosubay og single round robin format ug usa lang ka team matag bracket ang matagak. Ang nahabiling upat ka teams mag-ilog alang sa luna sa semifinal diin ang no. 1 makigsangka batok sa no. 4 ug ang no. 2 makigbatok sa no. 3.
Ang modaog sa semifinals maoy mo-abante sa finals, samtang ang mga pilderong koponan maoy magsangka alang sa ikatulong dapit.
Si Punta Princesa barangay captain Rolly Diorico, kinsa maoy nagpaluyo sa maong kalihukan mohatag og pakigpulong sa mga atleta.
Si Boy Atillo maoy tournament director, samtang si Rady Abarintos, ang hepe sa Assessment Division sa Bureau of Customs maoy adviser sa FYA. – BANAT NEWS