CEBU, Philippines - Sa gipaabot, ang topseed Hotel Fortuna/SWU Cobras wala maglisod pagpukan sa no. 8 ranked Virginia/CIT Wildcats ug ila kining gilubong, 82-59 aron pag-abante sa semifinals sa CESAFI Partner’s Cup kagahapon didto sa Cebu Coliseum.
Gumikan niini, ang Cobras nagpaabot na lang sa modaog sa laing quarterfinal match up tali sa Prime Asia/UV Lancers batok sa CDO Idol/USPF Panthers nga padayon pang nagkumbati ning pagsulat.
Sa laing bahin, ang second seed Enervon/UC Webmasters nagtinguha usab nga makakuha og pasaporte sa semifinal diin ilang harungon ang no. 7 R. Lapid’s/DBTC Greywolves. Ang Webmasters ug ang Lancers pulos nakabaton og twice-to-beat incentives.
Si coach Alejandrito 'Dodie' Miego sa Cobras wala na kaayo mogamit sa iyang starting unit nga tataw kaayo nga iya na kining gireserba alang sa malisud nga panagsangka batok sa Lancers.
Apan ang second unit mihatod og mensahe nga duna sab sila'y ikabuga human ang ilang 54-50 nga bentaha human sa ikatulong kuwarter kalit niburot ngadto sa 23 puntos.
Silang Eliud Poligrates ug Janno Nuñez parehong milansang og 14 puntos alang sa Cobras, samtang si Alfred Belande mitukob og 11 puntos.
Ang Wildcats, kinsa igo lang mi-iskor og nuybe puntos sa ikaduhang kuwarter gipangulohan ni Sherwin Resilla pinaagi sa iyang 41 puntos.
Puntos Matag Usa
Hotel Fortuna/SWU (82) -Poligrates 14, Nuñez 14, Belande 11, Diango 8, Pria 7, Litorja 6, Zanoria 6, Gianchan 5, Pacquiao 4, Armecin 4, Jalandoni 3
Virginia/CIT (59) - Resilla 41, Cañete 5, Cabañero 4, Molero 4, Regis 3, Lopez 2. – BANAT NEWS