CEBU, Philippines - Natapos sa usa ka kontrobersiyal nga kadaugan ang Cebu leg finals sa 2009 Smart-Liga Pilipinas dihang nidaog ang Misamis Oriental Meteors batok sa M. Lhuillier-Cebu Niños pinaagi sa duha ka free throws ni Mark Yee, 69-68 aron paglangkat korona sa 2009 Smart Liga Pilipinas kagabii sa University of San Carlos (USC) Gym.
Unang gipamatud-an sa Meteors nga dili taghap ang pag-abante nila sa finals dihang mipabuto sila sa ilang init nga opensa sa first period aron i-ugbok ang kuwatro puntos nga bentaha, 19-15.
Ang kanhi PBA veteran nga si Joey Mente kinsa mao usab ang finals MVP mibugha og nuybe puntos sa first half sa iyang kinatibuk-ang 14 puntos.
Misumbalik hinuon og pangataki ang Cebu Niños pinaagi sa pagpangulo nilang Mark Ababon ug Ariel Mepaña nga nagkumboya og 17 puntos aron pagsakmit sa labaw, 38-29, paingon ngadto sa second half.
Sila si Dexter Micutuan ug Mente nagkumbuya og 14 puntos sa third period aron kibhangan ang labaw sa Cebu Niños ngadto na lang sa tres puntos, 55-52.
Ang bench player nga si Rocky Sanchez, kinsa igo lang gipasulod sa fourth quarter nakatampo sab og daku alang sa kadaugan sa Misamis Oriental dihang. Si Sanchez mipugnit og otso puntos sa maong kuwarter aron ilogon ang labaw gikan sa Cebu Niños sa iskor nga 63-61 sa nahabiling 4:49 sa duwa.
Wala magpa-alkanse ang sinaligang three-pointer sa Cebu Niños nga si Stephen Padilla mitusak og tulo ka three-point shots diin usa niini maoy nakapalabaw kanila og balik, 68-67, sa nahabiling 23.5 segundos sa final quarter.
Hayag na unta ang kadaugan sa Cebu Niños dihang nasipyat ang jumpshot ni Sanchez, apan mitawag og usa ka kontrobersiyal nga foul si referee Wilbert Culanag ngadto ni Mepaña nga maoy naghatod ni Yee ngadto sa free-throw line nga maoy mikandado sa kadaugan.
Ang tawag ni Culanag maoy miduslit sa wala kapugngi nga kainit ni coach Raul 'Yayoy' Alcoseba, kinsa wala makauyon sa maong desisyon. – BANAT NEWS