Mga Duwa Karon (Cebu Coliseum)
4:00 pm Pampanga vs. Taguig
6:00 pm Cebu vs. MisOR
CEBU, Philippines - Milansang sa ilang ikasiyam nga daog ang Misamis Oriental Meteors ni Governor Oscar Moreno ug coach Jun Noel dihang ilang gipilde ang Pampanga Buddies, 83-72 sa Cebu City leg sa 2009 Smart Liga Pilipinas Conference II kagabii diha sa Cebu Coliseum.
Ang kanhi sinaligan sa STI nga si Dexter Micutuan, kinsa maoy MVP sa miaging tuig nga NAASCU league ug si Mark Yee mikudlit og 17 puntos matag usa aron pangulohan ang kampanya sa Meteors, kinsa nidominar sa kinatibuk-ang duwa.
Miposte og 20 puntos nga labaw ang Meteors, 54-34 sa tunga-tungang bahin sa third quarter, apan ang Buddies ni coach Allan Gregorio wala mahubsi'g paglaum ug padayon kining nakigbisog hangtod nga ilang nakan-an ang labaw ngadto na lang sa sayes puntos, 70-76 human sa triple ni Don Camaso sa nahabiling 41 segundos sa regulasyon.
Sila si Yee, Mark Moreño ug Ramil Tagupa mihimo og 4-of-6 gikan sa foul line aron pagselyado sa kadaugan sa Meteors.
Si Joey Mente mitimbre og 14 puntos alang sa Meteors, gisundan ni Mel Latoreno nga mitimang og 10 puntos.
Ang pilderong Buddies gipangulohan sab ni Camaso, kinsa mibugha og 16 puntos, samtang sila si Khiel Misa, Terrel Theopile ug Allan Evangelista nagkumboya og 33 puntos. – BANAT NEWS