CEBU, Philippines - Segurado nga makampiyon ang Cebu bisan pa'g wala makalusot ang ilang men's lawn tennis squad ug mibusdak og duha ka bulawan sa athletics human sa ikaduhang adlaw sa 2009 Private Schools Athletic Association (PRISAA) Regional Games kagahapon didto sa Dumaguete City.
Ang Cebu nakahipos na'g 19 golds sa men’s division ug 18 ka golds sa women's category.
Ang managsuong Delposo nga silang Eugene ug Joel nanghawod sa 10,000m run ug 1,500m run.
Sila si John Philip Duenas UG Sheena Gacayan mao sab ang nanghawod sa 3,000m run, samtang sila si Miscelle Gelbuena ug Ian Bernido nidaog sa 5,000 run. Silang Jade Rivera ug Eden Dampios maoy naghari sa 5K walkathon, si Laravie Dino sa 3K walk, ug wala sab magpabitin si Leo Abella kinsa nisakiyo sa 10K walk.
Mikabkab sab og laing bulawan sila si Irin Baluran ug Ernesto Ybanez pinaagi sa long jump competition, samtang si Richard Costudio nagmangtas sa javelin throw.
Gidominar sab PRISAA-Cebu tracksters
ang men ug women’s 4x400m ug 4x100m meter relay didto sa bag-ong rubberized track oval sa Lamberto C. Macias Sports Complex.
Didto sa Lorenzo Teves Aqua Center, ang mga Sugbuanon mihakot og 10 ka gold, lima ka silver ug lima sab ka bronze medals sa men’s bracket ug adunay 2-6-2 g-s-b medal tally sa women’s category.
Si Noel Caneda sa UC maoy nangulo sa Cebu swimming squad human nidominar sa
200m ug 400m individual medley ug 200m breaststroke.
Lain pang nihakot og gold medal sa swimming mao sila si Pete Guno, Rowan Fernandez, Vincent ug Maribeth Ababon ug sa 4x100m medley relay team nga gilangkuban nilang John Solon, Rowan Fernandez, Pete Guno ug Noel Caneda. (BANAT NEWS)