Girakrakan sa Utah Jazz og nagpungasi nga puntos ang New Orleans Hornets sa fourth quarter aron pag-iskor og 102-88 nga kadaugan kagahapon sa nagpadayong aksiyon sa National Basketball Association (NBA).
Mihana na unta og sikit ang Hornets apan naghugpong pag-usab ang Jazz aron mo-inat sa labaw ngadto sa 11 puntos, 91-80 sa may 6:48 sa kataposang kwarter apan ang kinadak-ang labaw misaka sa 15 puntos, 96-81.
Wala mo-irog ang iskor sa Hornets gikan sa 10:53 sa fourth period hangtod nga naka-iskor og three-point play si Rasual Butler may 3:36 na lang ang nahibiling oras.
Ang Jazz pinaagi sa iyang 25 puntos ug si Deron Williams mi-iskor og 20 puntos uban ang 16 ka assists. Ang Jazz naghupot na karon og 33-23 nga baraha ug labaw lang og usa ka daug tali sa Hornets kinsa may 32-22 nga baraha.
Laing Jazz nga miiskor og double figures mao sila si Ronnie Brewer ug Paul Millsap kinsa may 16 ug 12 puntos matag usa kanila.
Ang Hornets gipangulohan ni Chris Paul pinaagi sa iyang 24 puntos, lima ka rebounds ug pito ka assists ug gisundan siya ni Rasual Butler kinsa mi-iskor og 21 puntos.
Sa laing duwa, midaug ang Miami Heat batok sa Philadelphia Sixers, 97-91, gilubong sa San Antonio Spurs ang Washington Wizards, 98-67, gimakmak sa Dallas Mavericks ang Sacramento Kings, 116-95 ug midaug ang Golden State Warriors batok sa Oklahoma City Thunder, 133-120. - BANAT NEWS