CEBU, Philippines - Nakadala ang host-Cebu Blue Marlins Swim Club og 2,132 puntos sud sa 49 ka events aron dominahon ang 1st Osky Mabilog Memorial Cup kagahapon didto sa Cebu City Sports Center.
Daku kaayo’g gintang sa biya ang nagsunod sa Blue Marlins nga mao ang Negros Oriental Blue Dolphins, kinsa nakatigom og 687 puntos.
Mipahiluna sa ikatulong dapit ang Iloilo Sea Warriors Swim Club nga nakakuha og 641 puntos, samtang ang Cagayan de Oro maoy mipahiluna sa ikaupat nga dapit nga adunay 478 puntos ug ang Blue Sharks Swimming Club maoy mikapyot sa ikalimang dapit sa ilang 263 puntos.
Mikabkab sab ang CBM og 24 ka bulawang medalya ning maong kompetisyon nga gipaluyohan sa Philippine Amateur Swimming Association.
Nangulo sa koponan mao si Michael David Vega sa iyang upat ka gold medals sa men’s 18 over division.
Si Anthony Linn Navarro mitunol sab og tulo ka bulawan, samtang ang iyang igsuong si Lyh Ann nakakuha og usa ka gold. Sila si Noel ug Trina Cañedo adunay tulo ka golds matag usa.
Lain pang pambato sa CBM, kinsa mihakot og bulawan kagahapon mao sila si Aimee Sanchez nga adunay tulo ka golds, Rian Tapang ug Karen Indaya nga adunay duha ka golds matag usa, Beverly Vasig, Romylyn Ignacio ug Kristina Torres nga mihakot og tagsa ka gold.
Ubang mga koponan nga misalmot mao ang Iligan Spring Eels (247 pts.), North Shored Waves Swim Club (174 pts.), Ninirayan Tadpoles (173 pts.), Dadiangas Torpedoes (159 pts.), Dipolog Blue Marlins (74 pts.), University of San Jose-Recoletos (51 pts.) ug ang Palawan Swim Club (20 pts.). – BANAT NEWS