CEBU, Philippines - Midominar ang reigning WBO Oriental featherweight titlist nga si Eric Canoy sa ilang 10 rounder bout batok ni Elmer Legaria sa ilang non-title fight didto sa Zamboanga City Coliseum.
Gipakita ni Canoy ang iyang mas taas nga kasinatian dihang iyang gilumsan sa job ang mas batan-ong kaatbang.
Ang tulo ka mga hurado niiskor og 99-93, 98-94 ug 98-97 pabor kang Canoy.
Tungod sa maong kadaugan, si Canoy nipalambo sa iyang record ngadto sa siyam ka daug, lima niini gikan sa knockout. Si Canoy mangandam na alang sa sunod niyang title defense didto sa Thailand karong Marso.
”We will bring him to Thailand for his title defense, then if he wins it, he can go to Japan or the US. He is now ready to fight outside of the country,” matud pa ni Zamboanga congressman Erbie Fabian.
Sa iyang bahin, gipadayon sa undefeated WBO Oriental superfeatherweight champion Anthony “ Rocky” Marcial ang iyang pagpangharus og daog dihang iyang gipalukapa si Jovi Merca sa Butuan Dako Plaza Stable sa unang round sa ilang bikukbukay.
Ang knockout artist nga si Marcial mipahagsa ni Merca sa duha ka higayun sa round one nga maoy nakapaaghat ni referee Andres Manatad nga ihunong ang away.
Si Marcial nga nagkupot og record nga 13-0, 12 KOs mangandam alang sa iyang away batok sa gikalisangang si Daniel Ponce De Leon karong Abril 25 didto sa Manila. - Lemuel P. Maglinte (BANAT NEWS)