CEBU, Philippines - Ang ALA Promotions sa pakig-uban sa Summit Natural Drinking Water mopahigayon sa ilang binulan nga boxing tour karong Pebrero 21 didto sa Plaza Lapazan sa Cagayan de Oro City.
Mangulo sa away sa Philippine lightweight championship mao si undefeated title holder Jason Pagara sa Cagayan de Oro City, kinsa makigsinukliay og kumo ngadto ni fast-rising knockout artist JR Sollano sa Rex 'Wakee' Salud Stable.
Ang 16-anyos nga si Pagara naghupot sab og World Boxing Organization (WBO) Asia-Pacific title.
Si Pagara adunay 16-0 record, usa ka draw ug siyam ka daog pinaagi sa stoppage. Iyang gipahigda ang tulo sa katapusan niyang upat ka away.
"The fight will not go the distance and I believe my boy will be the last man standing. He cannot afford to lose face in front of his hometown fans," matud pa ni Brgy. Capt. Mario Eronico, ang manedyer ni Pagara.
Si Pagara dili mohatag og kompiyansa ngadto ni Sollano bisan pa ang garbo sa RWS Stable nagbitbit og dili kaayo impresibo nga 14-9 win-loss record, hinuon nakatumba kini'g 10 ka kontra.
Sa laing bahin, duha ka support bouts ang nakalinya diin si Marjohn Yap sa Cagayan de Oro City moharong ni Rodel Veronque sa Kaamiño Stable, samtang si Jerson Mancio makigbinukbukay batok ni Rocky Sardido sa Davao del Sur.
Adunay kinatibuk-ang 42 ka hugna ang gihan-ay ning boxing presentation sa Summit Natural Drinking Water nga bukas ug libre sa tanan. – BANAT NEWS