Cebu - Atubangon na ni AJ 'Bazooka' Banal ang iyang dakung misyon sa dihang iyang sangkaon ang Indonesian super flyweight champion Nouldy Manakane karong adlawa didto sa Island City Mall carpark sa Tagbilaran City.
Mao kini ang unang away ni Banal human sa iyang mapait nga kapildihan ngadto ni Rafael Concepcion sa Panama pinaagi sa 10th round KO niadtong Hulyo 26 sa miaging tuig.
Ang Indonesian champion nga si Manakane nilangkat sa 115 lbs. title pinaagi sa unanimous decision batok sa iyang paysano nga si Jemmy Gobel niadtong Marso 18, 2007. Nabugto ang iyang unom ka sunod-sunod nga kadaugan dihang gipukan siya ni WBO No. 1 ranked Promansak Posuwan sa Thailand sa ilang WBO Asia-Pacific championship fight.
Kinahanglan nga dag-on sa 20-anyos nga si Banal ang maong away aron masukod ang iyang potensiyal ug mahimong hagdanan aron mamahimong world champion.
Si Banal nagbitbit og 17-1-1, 14KOs ug ranked No. 8 sa International Boxing Federation (IBF) ug No. 10 sa World Boxing Association (WBA).
Gawas ni Banal, laing ALA Boy nga si Czar 'El Imperador' Amonsot moharong sab ni Indonesian ranked No. 2 lightweight contender Zoel Fidal. – BANAT NEWS