CEBU - Mikulit og krusyal nga kadaugan ang Trisha & Karl (kanhi Trisha & Tracy) ni team owner Patrick Dadang dihang ilang gipukan ang MLS, 77-63 aron magpabiling buhi sa ilang tinguha pagsakmit og luna sa semifinals sa Labangon Youth Association (LAYA) 1st Ritchie Osmeña Cup niadtong Sabado didto sa Labangon Sports Complex.
Sa laing duwa, ang LAYA-Green Team nagkaduol sab sa ilang tinguha pag-abante sa semifinals human maka-ipsot batok sa LAYA-Maroon team sa iskor nga 81-80.
Ang Trisha & Karl ug ang Green pareho na karon naghupot og 5-3 win-loss records nga maoy ilang pasaporte sa sunod nga hugna.
Si Jade Flores maoy nangulo sa Trisha & Karl pinaagi sa iyang 35 puntos, samtang sila si Sonny Nemeño ug Boy Sello mitampo og 10 puntos matag usa.
Ang MLS kinsa midailos ngadto sa 4-4 win-loss nga baraha, gipangulohan ni Bern Ylanan sa iyang 14 puntos, gisundan ni Marvin Siaotong pinaagi sa iyang 13 puntos.
Sa laing bahin, si Mocong Abella mi-iskor og 34 puntos aron pangulohan ang Green, samtang si Kikoy Maucesa mao sab ang topscorer alang sa pilderong Maroon nga nagbitbit og 3-4 nga baraha.
Puntos Matag Usa
Ikaduhang duwa:
Trisha & Karl (77) - Flores 35, Nemeño 10, Sello 10, Navaja 8, Zapanta 6, Cajigas 4, Sacedon 2, Jabines 2
MLS (63) - Ylanan 14, Siaotong 13, Reyes 8, Enriquez 8, Luague 8, Siaotong 8, Trinidad 4
Ikaduhang duwa:
Green (81) - Abella 34, Pasana 14, Ynot 12, Pañares 10, Gallardo 7, Sanggala 6
Maroon (80) - Maucesa 37, Parilla 13, J. Sacedon 6, E. Sacedon 6, Pardinilla 6, Bacalla 5, Marzon 4, Laresma 3 (BANAT NEWS)