Cebu - Ang Cebu selection nga gilangkuban sa mga maayong laking spikers ang mogikan karon paingon sa Kinoguitan, Misamis Oriental aron mopakita sa ilang katakus sa 4th Annual Kinoguitan Volleyball Open 2009 Fiesta Cup.
Bisan og lig-ong kontender, ang pambato sa Sugbu gilauman nga makasugat og lisud nga duwa batok sa defending champion Foundation University (FU) sa Dumaguete Cit ug sa ubang mga nag-unang volleyball teams lukop nasud gikan sa Philippine Navy, Philippine Air Force ug Davao.
Naglangkob sa Cebu selection naglakip nilang Jonrey Sasing, Angellan Visoc, Clifford Cafe, Joreem Yu ug James Ryan sa University of Southern Philippines Foundation (USPF) ug Edward Carlo Teson, Kennith Bensig Rivera ug ang 1st Kinoguitan Open MVP nga si Roderick Arenasa sa University of San Carlos (USC).
Ang champion coach nga si Norvie Labuga sa USC mosilbe isip playing coach. Abagan siya ni Dave Ariza sa University of San Jose-Recoletos (USJ-R).
Gawas sa mga tropeyo ug medalya, ang kampiyon mobulsa og P45,000, ang second placer makadawat og P25,000 ug ang third placer makaangkon og P15,000. – BANAT NEWS