Cebu - Nagkinahanglan pa og overtime ang defending champion Boston Celtics human nila pahamtangi og laing kapildihan ang Toronto Raptors, 115-109 sa National Basketball Association didto sa TD Banknorth Garden sa Boston, Massachusetts.
Daku na’g kahigayonan nga modaog ang Celtics sa regulation, apan si Andrea Bargnani nakapasulod og three-pointer nga maoy nakatabla sa iskor, 93-all ug naghatod sa duwa ngadto sa overtime.
Sa dugang singko minutos, ang Celtics wala na gayod magpabiya human makapasulod si Pierce og three-pointer shot.
Ang 22 puntos nga nahipos sa Celtics maoy nahimong club record isip labing daku sa overtime aron buk-on ang karaang rekord nga 21 puntos nga ilang nahipos niadtong Enero 2, 1963 dihang ilang na-outscore ang San Francisco Warriors, 21-6 aron pagdaog sa iskor nga 135-120.
Si Paul Pierce nagmangtas kagahapon ug maoy nangu sa Celtics sa iyang season-high 39 puntos.
Sila si Ray Allen mitampo og 12 puntos ug si Brian Scalabrine miamot og 10 puntos alang sa Celtics.
Si Bargnani maoy nangu sa Raptors sa iyang 23 puntos ug si Chris Bosh adunay 18 puntos.
Sa laing duwa, mibaling og daog ang New Jersey Nets dihang ilang gipilde ang Oklahoma City Thunder, 103-99 pinaagi gihapon sa overtime, ang Utah Jazz midaog sab batok sa Indiana Pacers sa iskor nga 120-113, giihaw sa Portland Trail Blazers ang Chicago Bulls, 109-95.
Milansang sab og daog ang New York Knicks batok sa New Orleans Hornets sa iskor nga 101-95 ug ang Milwaukee Bucks midaot batok sa Washington Wizards, 97-91. - BANAT NEWS