Cebu - Samtang ingon pa lang niini kasayo, subsob na kaayo ang pagpangandam sa Philippine Sports Commission (PSC) ubos sa liderato ni chairman William 'Butch' Ramirez alang sa pagbansay-bansay sa mga atleta nga maoy modala sa ngan sa Pilipinas ngadto sa Laos Southeast Asian Games (SEAG) sa umaabot nga Disyembre.
Sa ingon niini nga paagi, modaku ang kahigayonan sa Pilipinas nga masakmit pagbalik ang overall championship sa SEAG gikan sa atong mga silingang nasud sa Southeast Asia.
Atol sa ilang executive board meeting niadtong Lunes, si PSC commissioner Fr. Vicente L. Uy, SVD mitug-an sa Banat News nga ilang sugdan og sayo ang pagbansay-bansay sa mga atleta nga adunay tulo ka paagi sa pagpangandam.
Matud pa ni Fr. Uy kini mao ang pag-ila kun unsang matang sa sports nga adunay dakung kahigayonan ang Pilipinas nga mohakot og medalya, pagpadala og memorandum ngadto sa mga National Sports Associations (NSA’s) aron pagtunol sa ilang mga kinahanglanon ug ingon man pagporma og task force nga maoy mo-atiman sa tanang mga kinahanglanon lakip niini ang financial assistance, foreign exposures ug uban pa.
Matud pa ni Fr. Uy nga niadto pang Disyembre 29 nila gisugdan pagbansay-bansay ang mga atleta gikan sa national pool ug ang PSC nangita na sab karon og dugang pang mga potential players ilabi na mga batan-on aron sugdan og sayo ang ilang training aron mahimo na silang andam alang sa 2012 London Olympics.
Kalabot sa amateur boxing, si Fr. Uy nagkanayon nga adunay ipahigayon nga National Open didto sa Bacolod City karong Enero 16 ug kabahin sa basketbol, dili kini makasinati og dakung suliran tungod kay maayo ang preparasyon sa RP Team.
Ang Pilipinas igo lang mipahiluna sa ikaunom nga puwesto sa miaging SEAG didto sa Bangkok, Thailand niadtong 2006 diin ang Thailand sab ang nahimong overall champion. - BANAT NEWS