CEBU - Nasakmit na sa Los Angeles Lakers ang numero unong luna human ilang gilumsan ang Portland Trail Blazers kagahapon pinaagi sa pag-iskor og 100-86 nga kadaugan atol sa ilang sangka sa nagpadayon nga National Basketball Association (NBA) didto sa Staples Center sa Los Angeles, California.
Kini tungod kay ang Lakers nga gipangulohan ni Kobe Bryant naghupot na karon og 27-5 nga baraha sa ilang 32 ka duwa. Ang kanhi lider sa pipila na ka buwan nga mao ang defending champion Boston Celtics (29-6) aduna nay 35 ka duwa ug ang Cleveland Cavaliers (27-6) nga maoy nagsunod sa Celtics aduna nay 33 ka duwa.
Ang mga mas paboritong teams napakgang sab kagahapon dihang nabugto sa New York Knicks ang ilang nagkutay nga walo ka pilde dihang ilang gileksiyon ang
Celtics pinaagi sa pag-iskor og impresibong 100-88 nga kadaugan didto sa Madison Square Garden sa New York City.
Gipakuratan sab sa Washington Wizards ang Cavaliers sa iskor, 80-77, gipahit sa Memphis Grizzlies ang Dallas Mavericks, 102-82 ug nasumpo sa Toronto Raports ang Magic sa Orlando, 108-102. Diriyot na sab mapilde sa adlaw’ng Domingo ang Detroit Pistons batok sa Los Angeles Clippers apan maayo na lang gani kay napasulod ni Allen Iverson ang iyang kataposang tirada sa may 4.9 segundos aron maka-ipsot sa iskor, 88-87.
Si Bryant maoy nangu sa Lakers pinaagi sa iyang 26 puntos, duha ka rebounds ug tulo ka assists ug gi-abagan siya ni Pau Gasol kinsa mi-iskor og 19 putos. Ang tulo ka mga starters sa Lakers wala kaayo makapamuntos apan maayo na lang gani kay ang ilang tulo ka players gikan sa bench maoy daku’g natampo sa ilang opensa.
Ang duha ka Yugoslavians nga sila si Vladimir Radmanovic ug si Sasha Vujacic mi-sikor og double figures uban ni Lamar Odom. Si Radmanovic nga taga Trebinje, Yugoslavia mihipos og 16 puntos, ang 12 niini pulos gikan sa fourth quarter samtang si Vujacic nga taga Maribor, Yugoslavia, mi-iskor og 11 puntos.
Ang Lakers kinsa midaug na og 15 ka sagunson nga duwa sa ilang homecourt, usa lang sa lima ka teams nga nakapilde sab sa Celtics karon nga season lakip niini ang Porltand, Golden State, Denver ug New York.
Si LaMarcus Aldridge maoy nangu sa Blazers sa iyang 22 puntos uban ang 11 ka rebounds ug upat ka assists. Ang Frenchman nga si Nicolas Batum gikan sa Lisleux, France maoy nagsunod kang Aldridge sa iyang 17 puntos, si Rudy Fernandez may 14 puntos, si Steve Blake may 13 puntos ug may 10 puntos si Gred Oden.
Sa laing bahin, tataw kaayong wala sa kundisyon ang Celtics nga nagsige lang og reklamo batok sa mga referees ug mitumaw karon ang mga pagduda nga kuwang og giladmon ang ilang bench aron makadepensa sa korona.
Hayan ang tubag karon mao si Stephon Marbury, ang badlungon nga player sa New York nga wala na paduwa-a sa ilang coach nga si Mike D’Antoni. Adunay taho nga interesado ang Celtics sa serbisyo ni Marbury kana kung mahingpit na ang buy-out sa nahisgotang player.
Ang Celtics igo lang nakalabaw og tulo ka puntos sa halftime, 53-50 apan gi-apas dayon kini sa Knicks kinsa naglabaw na sa third quarter, 66-60 ug mi-abot pa gani’g 11 puntos ang ilang labaw human sa usa ka three-point shot ni Al Harrington.
Padayong nakalabaw ang Knicks sa fourth period, 78-68 ug wala na kini nila lugaki tungod kay ilang na-outscored ang Celtics, 28-15.
Si Harrington mi-iskor og 30 puntos alang sa Knicks samtang sila si David Lee ug Chris Duhon may 14 ug 12 puntos.
Si Paul Pierce maoy nangu sa Celtics pinaagi sa iyang 31 puntos ug si Ray Allen mitampo og 16 puntos. Apan ang tulo ka laing sinaligan sa Celtics wala maka-iskor og labaw sa walo ka puntos ug napiang pa gyud si Kevin Garnett kinsa igo lang mi-iskor og unom ka puntos.
Ang kadaugan naghatag sa Knicks og 13-19 nga baraha apan layo gihapon kini kung itandi sa Celtics nga maoy nangu sa Eastern Conference sa ilang 29-6 nga baraha. (Gabby G. Malagar) (BANAT NEWS)