CEBU – Naglumpayat sa kalipay ang Sacred Heart Parents Association dihang napasulod ni kanhi UV Lancers’ shooting guard Jayzar Esperat ang iyang three-point shot atol sa paghuni sa buzzer nga maoy nakahatag sa iyang team og 104-101 nga kadaugan batok sa Tri J Marketing-Don Bosco aron pagsakmit sa korona sa 1st F.Llamas Youth Association (FYA) Friendship Cup sa usa ka kulba-hinam nga kumbate sa miaging gabii didto sa Vicente Sotto Momerial Gym sa barangay Punta Princesa, ning dakbayan.
Kalit lang nahanaw ang 11 puntos nga labaw sa Sacred Heart, 96-85 dihang migamit og trapping defense ang Don Bosco sa kataposang upat ka minutos sa duwa apan dali ra usab kaayo silang nakarokober.
Gipalig-onan sa Sacred Heart ang ilang kampo tungod sa pag-abag ni kanhi San Beda juniors point guard ug karon head coach sa Red Cubs nga si Britt Carlo Reroma ug ni kanhi SWU Cobra Cesar Ortega.
Naglabaw na ang Sacred Heart ug walo ka puntos, 99-91 ubos na sa duha ka minutos ang nahibiling oras ug kinahanglan lang sila mag-amping matag opensa apan tungod sa kahugot sa depensa sa Don Bosco, nagkasayop-sayop ang Sacred Heart ug hangtod na-apsan.
Ang Don Bosco nga gipangulohan ni Chrissar Llegunas nakigbisog og maayo ug hinay-hinay nilang gipapas ang labaw hangtod nakatabla sila sa iskor 101-all sa kataposang 29.4 segundos human sa duha ka free throws ni kanhi USC Warrior Mark Loyola.
Apan atol sa inbound, maayong pagkawani ni Esperat ang nagbantay kaniya ug samtang nag-dribble padung sa ilang frontcourt, kalit siyang mitira ginamit ang board ug maayo gyung pagka bulls-eye sa ring ug daw sa kandila nga gipang-ugbok ang habig sa Don Bosco nga dili unta mosugot nga tukma ang maong tirada sa oras apan ang mga referees mibarug nga nadungog pa nila ang huni sa buzzer dihang mi-itsa si Esperat sa bola pinaagi sa pagpabanda niini sa board.
Si Esperat, usa sa sinaligang tirador sa Lancers ug kanhi three-point champion sa Cebu Schools Athletic Foundation, Inc. (CESAFI) mibugha og 33 puntos alang sa Sacred Heart apan mao unta’y angayan basulon kung napilde pa sila tungod sa duha niya ka krusyal nga turnovers sa nagkapupos na ang oras.
Una, iyang nabuhian ang bola samtang nag-dribble dapit sa baseline ug naka-iskor ang Don Bosco. Sa ikaduhang higayon, nabuhian na usab niya ang bola samtang iya untang ilabang sa midcourt aron malikayan ang eight-second violation ug na-ilog sa Don Bosco unya naka-iskor usab ang uwahi sa samang paagi.
Ang iyang winning triple maoy nakatubos sa iyang duha ka sayop ug tam-is ang kadaugan kay nag-agi kini sa lungag sa dagum aron malikayan ang overtime.
Si Jaymar Canoy nga kanhi kauban sab ni Esperat sa UV mi-iskor og 20 puntos ug si Cesar Ortega mihipos og 15 puntos lakip niini ang lawom kaayong reverse lay-ups.
Si Reroma nga nagkapuliki og panglawog sa iyang mga kauban, mitampo og 12 puntos. Halos tibuok duwa nga way puli-puli si Reroma kay sila lang si Vernini Tangarorang ang point guard sa Sacred Heart niadtong duwa-a.
Naunhan sa Sacred Heart ang Don Bosco, 6-0 ug sila kanunay maoy naglabaw gawas lang sa sayong bahin sa second quarter diin nakalabaw ang Don Bosco og upat ka puntos, 39-35 apan ila lang usab dayon nga gipapas.
Si Llegunas ug si Loyola parehong mi-iskor og 21 puntos alang sa Don Bosco samtang si Jorey Perez mitampo og 17 puntos ug si Junbel Llegunas nga manghod ni Chissar, mi-iskor og 12 puntos.
Puntos kada usa:
Sacred Heart (104)—Esperat 33, Canoy 20, Oretga 15, Reroma 12, Bacalso 12, Tangarorang 6, Nazareno 4, Chua 2
Tri J-Don Bosco (101)— C. Llegunas 21, Loyola 21, Perez 17, J. Llegunas 12, Padayao 9, G. Canceko 8, Noel 7, Santos 4, J. Canceko 2 Halftime: 48-50 (Gabby G. Malagar) (BANAT NEWS)