CEBU - Padayon karon ang sabut-sabut sa kampo sa undefeated Junior Middleweight champion Julio Cesar Chavez Jr. aron kumbinsihon ang kampo sa Golden Boy Promotions nga mahinayon ang away ni Chavez Jr. batok ni Oscar “Golden Boy” De la Hoya.
Ang 22-anyos nga si Chavez kinsa mao karon ang rank No.4 sa 154-division gustong moatubang ni De la Hoya sa dili pa kini makadesisyon nga moretiro. Ang batan-ong Mehikano kinsa nidaog sa katapusan niyang away batok ni Matt Vanda nagkupot karon og rekord nga 38 ka daog diin 29 niini gikan sa knock-out.
Usa usab sa rason nganong makig-away si Chavez kang De la Hoya, tungod sa gusto kining makapanimalos alang sa iyang amahan nga si legendary boxer Julio Cesar Chavez Sr. kinsa gipatumba ni De la Hoya sa fourth round niadtong Hunyo 7, 1996 didto sa Cesars Palace, Las Vegas.
Gitakda na usab ang venue kung mahinayon ang maong away, usa sa mga gipilian mao ang nabantog nga Azteca Stadium didto sa Mexico City.
Wala pa hinuon muhatag sa ilang habig ang kampo ni De la Hoya kinsa atua pa karon sa Puerto Rico aron magbakasyon human siya gipahunong sa ninth round ngadto ni pambansang kamao Manny “Pacman” Pacquiao niadtong Disyembre 6, didto sa MGM Grand Garden Arena sa Las Vegas. (BANAT NEWS)