CEBU – Nilampos ang banggiitang featherweight boxer nga si Michael Farenas sa iyang pakigsangka sa bisitang Thailander nga si Thai Sunan Thosen niadtong miaging gabii didto sa Mandaluyong Gym, Mandaluyong City.
Gigamit ni Farenas ang dako niyang pabor sa gidak-on aron mapukan si Thosen, atol sa round three, usa ka makusug nga kinumo gikan sa Pinoy ang niigo sa Thailander nga miresulta sa usa ka technical knockout.
Tungod sa maong kadaugan, si Farenas nisaka karon sa 24-4-2, 21KOs nga record samtang ang pilderong si Thosen natagak ngadto sa 12-6, 4KOs nga record.
Si WBO bantamweight champion nga si Gerry Peñalosa nagplano karon nga ilakip si Farenas sa undercard sa umaabot niyang away. Lakip sa mga gipilian nga sunod ikasangka ni Farenas mao ang Australian nga si Bill Dib ugang Mehikanong si Hector Velasquez kinsa gipilde sa pambansang kamao Manny Pacquiao pinaagi sa usa ka sixth round knockout niadtong Septyembre 10, 2005. (Arnie P. Atuel) (BANAT NEWS)