CEBU - Pasidunggan na ang mga sikat ug banggiitang karerista sa nagmalamposong 3rd MS Motosuit Motorcross Series sa usa ka awarding ceremony karong alas-7:00 sa gabii didto sa grand ballroom sa Holiday Plaza Hotel.
Gawas sa mga riders nga nipakita og nindot nga labok sa tagsa-tagsa nila ka mga categories sa 14-leg series, pasidunggan usab ang mga pribado ug government sectors nga nisuporta sa MS Motosuit.
Lakip sa mga personalidad nga makadawat og plaques of recognition mao sila si Brgy. Captain Manuel Wagas ( Jubay, Liloan ), Mayor German P. Sarana (Bayawan City, Negros Oriental), Brgy. Capt. Gumersendo Jubay, Jr. (Calambua, San Remigio), Redan Juarez (Sagbayan, Bohol), Mayor Erwin Agustino (Ayungon, NegOr), Mayor Mariano Martinez (San Remigio), Mayor Yvonne Cabaron (Moalboal), Atty. Flint Concha (Dipolog City), Vice Mayor Chonse Moreno (Aloguinsan), Macoy Larrazabal (Ormoc City), Archt. Elmer Talan (Baclayon, Bohol), Mayor Avelino Gungob, Sr. (Concolacion), Siegfred Ornopia of Keiz BJ Motorsales (Ilihan, Tabogon), ug Rudy Nadela (Liboron, Carcar).
Giatangan usab ang paghatag sa “Rider of The Year” award ngadto sa 36-anyos nga si Seigfred Ornopia.
Ang tag-iya sa Keiz BJ Team nga si Ornopia maoy nangharus sa executive A division sa iyang 395 points, ang iyang kauban nga si Gener Sicad mao usab ang nanghawod sa executive B pinaagi sa iyang 286 points.
Mokumpleto sa mga kampiyon sa tagsa-tagsa nila ka mga categories mao si Boni Bustillo sa local enduro nga aduna’y 351 points ug sa novice enduro nga mirehistro og 321 points. Ang MS Motosuit image model John Flores sa beginners open production nga mikulit og 286 points, Clark Wagas sa Quickflight Racing sa novice production nga mitigom og 280 points, Rex Barbaso sa Nonoy Reluya Team sa intermediate class sa iyang 225 points, ug Irwin Uypitching sa Dumaguete’s RUSI Rusco Team sa experts division nga mikulit og 262 points. (BANAT NEWS)