Cebu - Human sa nahitabong binakbakay niadtong miaging adlaw didto sa Compostela, napamatud-an karon sa beteranong si Rodel Quilaton nga usa gihapon siya sa mga banggiitang boksidor dinhi sa kabisay-an dihang gilangkat niini ang Philippine Boxing Federation (PBF) junior flyweight gikan sa mga kamot ni Ronald Castrodes.
Si Quilaton nga midaog pinaagi sa usa ka unanimous decision nakakuha og 95-92 nga pabor gikan sa tulo ka hurado.
Nagkanayon si Quilaton nga gipangandaman niya ang maong away pinaagi sa wala’y puas nga ensayo.
Sa iyang bahin, si Castrodes kinsa nakatagamtan sa una niyang kapildehan nakatagamtam sa kabangis sa kumo ni Quilaton nga maoy hinungdan sa pagkalup-og niini sa round six.
Ang maong kadaugan giisip ni Quilaton nga usa ka bililhong kalamposan, kahindumduman nga si Quilaton nakatagtam og kaparotan dihang gipukan siya ni Junreil Casimiro atol sa ilang PBF flyweight bout.
Sa mga wala kasaksi sa “Thrilla ni Compostela”, ang CS/9 mupagawas sa delayed coverage niini karong Sabado sa boxing program niini nga “Main Event” sa ala-1:00 sa udto. - Arnie P. Atuel (BANAT NEWS)