Cebu - Nilampos ang Team Cebu City’s Under-15 football squad sa paglangkat sa kampiyonato sa ilang division atol sa pagtapos sa 3rd Philippine Olympic Festival kagahapon didto sa Cagayan de Oro City .
Ang Team Cebu mikulit og usa ka 1-all draw batok sa Negros Oriental aron malabni ang titulo. Tungod sa single round system, ang TCC maoy gikoronahan nga kampiyon tungod sa dakong puntos nga nahipos niini.
Si Thomas Booth maoy unang nipasulod sa tira aron hatagan og uno punto ang TCC Under-15 , si Booth mao ang usa sa mga kanhi miyembro sa championship team nga nidaog sa POF final niadtong miaging tuig.
Ang mga Sugbuanon maoy nidominar sa duwa sa pagsugod sa duwa apan nisumbalik ang Negros Occidental og puntos sa nahibiling dos minutos aron tablahon ang duwa.
Bisan pa man sa pag-atake sa Negros, nagpabiling kalma ang TCC sa naghinapos nga segundos sa duwa.“Time was already running out so even if Negros was able to score, my boys weren’t alarmed. They remained focused,” matud pa sa ilang coach nga si coach Joselito Bono.
“Giubanan gyud ta ni Niño, (Sto.Niño).. He is with us all the way that’s why I feel so blessed. Before the start of the competition, I told the boys to pray hard and play well for their parents who came here to support the team and asked nothing in return but to win which we did,” dugang pa ni Bono.
Mokompleto sa TCC Under-15 team mao sila si Rex Miguel, Raphael Clifford de Guzman, Christrian Jerico Noel, Miguel Caindic, Ethan Decena, John Caballero, John Paulo Labajo, Junjay Arizabal, Joseph Lorenzo Mercado, Christian Keen Agot, Valentino Calvo, Peter Diaz, Allan Abella, Rex Joseph Gealon, Dennis Noel Legaspi, Martin Mendoza and Carmelo Genco.
Ang 14 ka mga magduduwa nagagikan sa Don Bosco ug duha ka produkto sa Cebu International School ug PAREF-Springdale.Ang ilang assistant coach mao si Rommel Ramirez uban nila ni Robert Nicart ug Michael Culibra nga maoy acting referees. – BANAT NEWS