Cebu - Human sa kadaugan ni Manny Pacquiao dihang gipukan niini si De la Hoya, hugot karon ang tinguha sa kanhi IBF minimumweight champion Florante Condes nga molampos usab sa iyang away batok sa bag-ong sulbong nga taga-Manila Ronelle Ferreras sa main event sa “Triple Thrilla in Compostela” karong adlawa didto sa Compostela Sports Complex.
Ang 28-anyos nga si Condes nanganting modaug aron makabawi human siya gilangkatan sa iyang bakus sa Mehikanong si Raul Garcia sa una niyang title defense niadtong Hunyo 14 didto sa Estadio Arturo C. Nahl sa La Paz, Baja California Sur, Mexico.
Sa maong away, gipatumba ni Condes si Garcia sa round five, apan napilde siya pag-abot sa iskor sa hurado pinaagi sa usa ka spilt decision. Si Condes kinsa gitawag og “Little Pacquiao” tungod sa makusug niining kumo sama sa pambansang kamao nagkupot karon og 22-4-1, 20KOs.
Sa iyang bahin,gipasidan-an ni SGG Promotions Big boss Sammy Gello-ani si Condes nga dili mokompiyansa ni Ferreras. “Although his opponent is a newcomer, Condes couldn’t take him lightly because Ferreras is a fighter and a very good boxer,” matud pa ni Gello-ani.
Sa supporting bout, magbinukbukay ang undefeated WBO Asia-Pacific youth flyweight champion nga si Marvin “Marvelous” Sonsona kontra ni Jason Jeda samtang si Anthony “Rocky” Marcial mo-away ni Cris Alag sa Butuan City sa usa ka 10 rounder match.
Mopakita usab og aksiyon ang Boholano nga si Ronald Castrodes nga modepensa sa iyang bakus kontra Rodel Quilaton, samtang si Samuel Galinato makigsangka usab sa Sugbuanong si Edcel Tuñacao. - BANAT NEWS