CEBU - Sugdan na sa no. 1 seed University of San Carlos-South Campus ang ilang kampanya pagdepensa sa korona sa dihang ilang harungon ang igsuong koponan ug fourth seed USC-North karong hapon sa crossover semifinals sa juniors division sa Future Basketball League (FBL) diha sa Sacred Heart School-Jesuits (SHS-J) gym sa Gen. Maxilom Avenue.
Ang engkuwentro sa duha sugdan sa alas-4 sa hapon.
Sa pasiunang duwa nga gikatakda sa ala-1 sa hapon, ang SHS-J, ang top ranked squad sa mini division makigsangka batok sa USC-South, samtang ang second seed Don Bosco moharong sa no. 3 qualifier USC-North.
Sundan kini sa sangka sa mini division semis diin ang no. 1 seed SHS-J makigpinaksitay batok sa Don Bosco ug ang USC-North makiggubat batok sa mortal nga kaaway USC-South.
Si Janmar Regidor, anak ni kanhi USC Warrior Lou Regidor maoy usa sa mga sinaligan sa juniors division uban nila ni Bradley Bacaltos ug Fil-Nigerian Richgreen Nwanaka.
Ang USC-South midget division pagatimonan ni Ian Ortega, anak ni ex-SWU Cobra Cesar Ortega, kinsa usa sa aktibong sakop sa USC-South Campus PTCA ug ang organizer sa 8th PTCA cagefest.
Ang top two seeds sa semifinals nakaangkon og twice-to-beat incentives.
Ang FBL nga gipaluyohan sa Primovit, gitukod ni USC basketball consultant Mike Reyes. (Gabby G. Malagar) (BANAT NEWS)