CEBU - Gibutyag ni Guadalupe Athletic Association (GAA) presidente Dr. Boy Te nga adunay pagahimuon nga GAA All-Star games sa tulo ka kategoriya unya sa Disyembre 7 diha sa Guadalupe Sports Complex.
Matud pa ni Te nga ang maong kalihukan maoy molamas sa pagsaulog sa tinuig nga kapistahan sa Birhen sa Guadalupe karong Disyembre 12.
Ang GAA Selection ni coach Te, makigharong batok sa Mandaue Jaycees alang sa main game.
Sa laing bahin, ang North All-Star makigsangka batok sa South All-Star, samtang sa preliminary game nga sugdan sa ala-1 sa hapon, ang Dark All-Star makigsangka batok sa White All-Star sa 50-above category.
Mao kini labing unang higayon nga ang GAA All-Star games adunay tulo ka duwa.
Sa laing bahin, ang Cebu Movers System ni Te nagpabiling walay pilde sa 12 ka duwa sa GAA, lakip ang ilang 2-0 sa GAA 9th Founder’s Cup. – BANAT NEWS