CEBU - Mga ginikanan ug ubang mga magtutudlo sa University of San Carlos-Basic Education South Campus (USC-BED SC) nga mahiligon og basketbol ang mag-abot ugma sa pagbukas sa 8th PTCA Inc. basketball tournament sa covered court sa maong tunghaan.
Si south district congressional aspirant Jonathan Guardo maoy pinasidunggang dinapit ug mamumulong.
Napulo ka teams nga mosalmot ning tinuig nga kalihukan sa paugnat sa kusog nga gisugdan niadtong 2000 ni ex-SWU Cobra Cesar Ortega.
Ang opening program sugdan sa alas-9 sa buntag, sundan dayon sa kumbati pinaagi sa pagbunot nga modeterminar sa han-ay sa duwa.
Si PTCA Board auditor Jess Gabatan maoy mangulo sa oath of sportsmanship, samtang si Guardo maoy mangulo sa ceremonial toss uban ni PTCA president Dr. Hermes Ibon.
Ang maong kalihukan usa sa mga highlights sa USC-BED SC PTCA, Inc. Family Day celebration karong Disyembre 14.
Atol unya sa final, adunay exhibition game tali sa PTCA Selection batok sa ilang PTA counterparts. – BANAT NEWS