CEBU – Ang duha ka free throws ni Cogon, Pardo councilor Jojo Ibones sa katapusang sayes segundos maoy nagtuboy sa Hero Commando Pistols pagkulit og daog batok sa UTASSCO Utility, 97-95 aron makuha ang 1-0 nga bentaha sa Power Forty Basketball Tournament Christmas League "best-of-three" finals niadtong Martes sa gabii didto sa Inayawan Sports Complex.
Ang Hero Commando milabaw og 95-92 sa katapusang 10 segundos, apan nakuratan kini dihang kalit lang mitira si Atty. Flor Yosores og three-point shot aron pagtabla sa duwa, 95-all.
Sa sunod nga posisyon, si Ibones nakakubit og foul ug yano kaayong mipasulod sa iyang duha ka free throws aron pagkandado sa kadaugan.
Si Nestor Javierto maoy nangulo sa Commando sa iyang 21, gisundan ni Peter Lalican sa iyang 20 puntos. Sila si Ibones ug Rudy Abadejos parehong mi-iskor og 13 puntos.
Si Atty. Yosores miburak og 30 puntos aron pangulohan ang UTASSCO, si Wilbor Cabrera miamot og 22 puntos, sila si Alex Mercado ug Jun Nacional miabuno og 14 puntos matag usa.
Sa sangka alang sa ikatulong dapit, ang Christine Traders midaog batok sa Park ‘N Go Bakeshop sa iskor nga 114-106.
Si Vez Eleguin, ang presidente sa Power Forty mikamada og 30 puntos, samtang sila si Joey Escalon ug Allan dela Rama nagkumboya og 52 puntos.
Ang Park ‘N Go gipangulohan ni Michael Arias sa iyang 24 puntos gisundan ni Melvin Layon nga mi-iskor og 23 puntos.
Ang Christine mao karon ang nag-una sa ilang best-of-three series nga adunay 1-0 nga baraha.
PUNTOS MATAG USA
Unang duwa:
Christine (114) - Eleguin 30, Escalon 27, Dela Rama 25, Dumale 18, Dacalos 8, Dejacto 4, Cayacap 2
Park ‘N Go (106) - Arias 24, Layon 23, Rama 14, Sabellano 9, Dejarme 8, Echavez 8, Ozon 8, Colinares 6, Yosores 4.
Ikaduhang duwa:
Hero Commando (97) - Javierto 21, Lalican 20, Ibones 13, Abadejos 13, Rosal 10, Cabañero 8, Genzon 6, Navares 4, Nacional 2
UTASSCO (95) - Yosores 30, Cabrera 22, Mercado 14, Nacional 14, Mabalon 6, Labajo 4, Yu 3, Batac 2 – BANAT NEWS