CEBU - Sa labing unang higayon sud sa tulo ka tuig, ang tinuig nga MS Motosuit Motocross Series tapuson og sayo pinaagi sa pagpahigayon sa 14th ug final leg ugma didto sa Carcar.
Giulohan og 2nd Carcar City Motocross Mayor’s Challenge, ang dakung kalihukan nga seguradong mokabig og laing bagang duot sa katawhan adto ipahigayon sa Ramona’s Recreational and Multi-Purpose Center.
Ang maong final leg gipaluyohan sab sa Imarflex Evvo Battery Manufacturing ug Castrol, mao unta ang penultimate leg, apan ang San Fernando nga maoy naandan nga mo-host sa final leg sa miaging duha ka tuig mibalibad ning higayona kay ang race course nga gipanag-iya ni motocross patron Nonoy Reluya gawion alang sa laing katuyoan.
Ang masaarong Cebuano daredevil nga si John Flores, kinsa usa sa mitambong sa paglusad sa final leg niadtong miaging gabii didto sa panimalay ni MS Motosuit big boss Lou Ornopia niangkon nga usa ka malisud ug kulbahinam nga aksiyon ang mahitabo ugma.
Ang 15-anyos nga si Flores nagkanayon nga iya na nga gipangandaman ang karera sa Carcar aron mapreserbar ang iyang kaayo ug bawion ang dili maayo niyang performances sa nangaging mga legs.
Sa laing bahin, ang matag dibisyon sa MS Motosuit Motocross Series adunay overall champion, kinsa mga kandidato alang sa tigiay sa “Rider of the Year” award.
Ang top performers ning maong series pormal nga pasidunggan atol unya sa ipahigayong grand awards sunod bulan diha sa Grand Convention Center of Cebu.
Si event organizer Lou Ornopia mituyo sa pagsayo sa awarding aron ang mga kalihukan sa MS Motosuit 2009 sugdan dayon sa Enero.
Ang MS Motosuit series sunod tuig mas modaku ug mas mabulokon gumikan kay gawas sa regular motocross action, si Ornopia mopasiugda og supercross ug motard competitions didto sa bag-ong racetrack sa Consolacion. – BANAT NEWS