CEBU - Labing menos walo ka away sa amateur boxers nga gikan sa lungsod sa Sibonga ang mopakita sa ilang abilidad karong gabii didto sa Sibonga Sports Complex sa Sibonga sa habagatang bahin sa Sugbu.
Sa main event sa kalihukan nga gipasiugdahan ni boxing promoter Lorenzo 'Chao' Sy, si Arwin Gil sa barangay Bato makigsinukliay og kumo batok ni Robert Pama sa barangay Abugon alang sa lightweight division.
Sa laing sangka, si Jayson Redulosa sa barangay Poblacion makigsangka batok ni Erick Rasalejo sa barangay
Sabang ubos sa featherweight division, si Antonio Olanda sa barangay Guimbangco-an makigtakus batok ni Rohan Malinao sa barangay
Abugon sa bantamweight division.
Adunay usa ka reserved bout nga gi-andam ubos sa flyweight division, apan mahimong makanselar kini kun dili motunga ang mga boksidor nga sila si Joemar Señor sa barangay Lamacan ug Daryl Solatorio sa barangay Poblacion.
Adunay lima ka paresan sa mga undercards ang magsangka diin si Simon Gonzales sa barangay Bagacay makigsangka batok ni Mark Nazaren Codera sa barangay Guimbangco-an sa mosquitoweight division.
Magtigi sab sa abilidad sila si Clarence Antopina sa barangay Sabang ug si Lorenzo Alferez sa barangay Bagacay sa pinweight division, Kinwell Sarona sa Badumpa Stable batok ni Caleb Padayao sa barangay Lamacan sa lightweight division, si Junril Reponte sa barangay Sabang moharong ni Verlindo Hernan sa barangay Bagacay sa lightweight division ug si Juvell dela Cruz sa barangay Lamacan makigtigi ni James Cañeda Jr. sa barangay Sabang ubos sa flyweight division. – BANAT NEWS