CEBU - Nakaangkon og luna sa Philippine Collegiate Champions League Sweet 16 ang University of San Jose-Recoletos (USJ-R) Jaguars ug ang pambato sa NCAA Letran Knights human nila gipalayas ang tagsa-tagsa nila ka kaatbang niadtong miaging gabii sa pagtapos sa PCCL Ormoc Zonals didto sa Ormoc Superdome.Ang Jaguars, ang losing finalists sa 8th Cebu Schools Athletic Foundation, Inc. (CESAFI) mi-unay og buntog sa laing Cebu-based team University of Cebu (UC) Webmasters, 95-87 sa tinaktakay nga duwa, samtang ang Knights, ang third placer sa milabay’ng 84th season sa NCAA luyo sa three-peat champion San Beda Red Lions ug Jose Rizal University, mipulbos sa West Negros University, 70-58.Gumikan niini, ang Jaguars ug ang Knights maoy molangkub sa PCCL Final 16 lakip nga makompleto human sa Cagayan de Oro qualifying round sunod semana. Ang UV Green Lancers nakaangkon og automatic slot isip reigning CESAFI champion.
Miagi pa og kulbahinam ang duwa sa Jaguars ug Webmasters tungod kay nagtabla pa ang iskor, 71-all sa nahabiling 6:30 sa fourth quarter, apan ang sayong pagka-fouled out sa higanteng 6-foot-8 nga si June Mar Fajardo sa UC, hinay-hinay nga mikiat ang Jaguars hangtod nga ilang nailog ang daog. – BANAT NEWS