CEBU – Ang Carmen Copper Corporation-Construction Services Department (CCC-CSD) Builders, kinsa maoy kampiyon sa 1st Aloguinsan Mayor's Cup Open basketball tournament moharong sa 1st Liga Pilipinas champion ML Kwarta Padala Niños karong Nobiyembre 28 diha sa CCC Recreation Center sa Lutopan, Toledo City.
Ang Niños ni coach Raul 'Yayoy' Alcoseba misanong na sa imbetasyon ni CCC-CSD team consultant Romy Cal nga makigsangka sa Builders sa usa ka exhibition game nga ulohan og "Reunion Match."
Matawag og usa ka reunion ang maong panagsangka tungod kay labing menos tulo ka players sa M. Lhuillier nga sila si Jerry Jaca, Aldrin Ocañada ug Raul Redulosa ang niduwa sa Builders.
Aron paghatag og balanseng sangka ug tumang kalingawan ngadto sa katawhan, paduwaon sa Builders ang 6-foot-11 nga si Gregory Slaughter sa University of the Visayas (UV) Green Lancers ang MVP sa 8th Cebu Schools Athletic Foundation, Inc. (CESAFI).
Sa preliminary game, ang Security/Administration Division makigsangka batok sa Mine Underground Division.
Ang sangka tali sa Builders ug Niños nahimong posible tungod sa paningkamot sa Our Lady of Mt. Carmel Parish Pastoral Council pinaagi sa ilang presidente nga si Tessie Ledesma Cal.
Kun dili maguba ang plano, si coach Alcoseba nagkanayon sab nga iyang dad-on ngadto sa Lutopan ang usa sa labing maayong sangka sa Visayas Amateur Athletic Association (VAAA) nga sugdan sunod semana.
Si Cal mibutyag nga adunay bag-ong tukoron nga commercial league si Alcoseba ug kini mao ang Cebu Basketball Association (CBA) diin ang Builders usa sa mosalmot niini. - Gabby G. Malagar (BANAT NEWS)