CEBU - Kun ikaw usa ka bilyarista ug unya gusto kang molambo gyud pag-ayo ang imong abilidad sa pagbakyaw sa tako, labing maayo nga buhaton nimo ang tanang mga paagi sa pagpauswag sa imong performance sa dula.
Pipila ka mga eksperto sa dulang bilyar nag-ingon nga panahon sa pagbansay-bansay ug sa aktuwal nga pagdula, labing maayo nga buhaton mo ang mga estilo o matang sa tayada nga wala nimo kaandi.
Sumala sa mga eksperto, may mga higayon nga angay mong irisgo ang imong preparasyon sa dula aron pagsuta kun asa ra kutob ang barometro sa imong katakus.
Gipasabot sa mga eksperto nga adunay mga higayon nga ang plastada sa mga bola sa ibabaw sa lamesa dili pabor sa imong estilo sa dula. Niini, kinahanglang mosagop ka sa estilo sa ubang mga magdudula nga epektibo sa usa ka partikular nga higayon kanus-a dili mosalir ang kaugalingon mong estilo.
Sa pagdula og bilyar, kinahanglan lagi nga flexible ang usa ka magdudula. May mga higayon man gud nga mahitabo ang plastada nga wala nimo paabota ug busa wala nimo kapangandami. Sa mga higayon nga mahitabo ang ingon niini, dili maayong magtanga ka lang. Kinahanglang mangita ka'g alternatibong solusyon sa gumonhap sa imong pagdula.
Sila si Alice Rim, Kerry H. Impson, Tom Ross ug uban pang mga respetadong billiard columnist parehong nag-ingon nga sa pagdula og bilyar, kinahanglang modukot ka gyud sa kaugalingon mong estilo. Sa higayon nga maestablisar na nimo ang imong kaugalingong estilo sa pagdula, mao na kana ang panahon nga mohinay-hinay ka'g sagop o bansay sa estilo sa uban agi'g pangandam sa mga sitwasyon nga dili epektibo ang kaugalingon mong estilo sa dula.
Buhata gyud ang tanan kun gusto kang molungtad og dugay sa kalibotan sa billiard sport.
* * *
MAGBILYAR TA TEXTMATE PORTION: 0905-8809516, 0929-6978595, 0929-6948021, 0918-3867726, 0920-8328671, 0910-6806589, 0929-2086112, 0919-6118538, 0929-3639284, 0909-6410593, 0923-8664800 ug 0909-5951669.
* * *
(Mga sugyot ug pakisayod? Text sa 0910-8105522) – BANAT NEWS