Hindi na kinailangan pa ng reigning UAAP champion Far Eastern U na pagpawisan sila ng todo upang dispatsahin ang St. Benilde sa pamamagitan ng 25-16, 25-14, 25-20 panalo at muling makabalik sa pakikisalo sa ikalawang puwesto sa Shakey’s V-League second conference sa The Arena sa San Juan City kahapon.
Sariwa pa mula sa kanilang runner-up finish sa Philippine University Games sa Dumaguete City, dinomina ng Lady Tams ang Blazers sa taglay nilang malakas na laro na naglimita sa kalaban na makapuntos matapos na maglatag ng matatag na depensa ang nagbigay sa Morayta-based spikers ng ikalawang panalo sa likod ng kanilang tatlong laro at makatabla ang San Sebastian Lady Stags.
Humataw si Shaira Gonzalez ng13 kills at tumapos ng 15 puntos, habang nag-ambag naman si Irish Morada ng 12 hits para sa Lady Tams, tangkang makapasok sa Final Four sa ligang ito na itinataguyod ng Shakey’s Pizza at inor-ganisa ng Sports Vision. Ang kabiguan ay lalong naglubog sa Lady Blazers sa ilalim katabla ang Lyceum na kapwa may 0-3 panimula.