CEBU - Samtang nagbasa-basa ako sa akong karaang sports book nga nag-ulohan "Joy and Sadness in Children's Sports" nga sinuwat sa usa ka Amerikanong professor sa sports psychology nga si Rainer Martens sa University of Illinois, akong hipalgan sulod sa maong libro ang usa ka artikulo kalabot sa usa ka baseball coach nga nag-ulohan "The Coach who Played to Lose," nga sinuwat ni Erma Bombeck.
Bisan tingali og si kinsa ang mobasa niadtong maong artikulo, madasig gyud sa pagbasa kay gilaliman ka'g mo-apil siya og liga aron lang magpapilde. Mao ra'y gidangat.
Kalabot kini sa usa ka Little League Baseball coach didto sa America nga si Ralph Corlis. Siya lang ang bugtong coach sa tibuok kalibotan nga nahimutang sa Baseball Hall of Shame sulod sa sagunson nga lima ka tuig.
Dinhi sa Pilipinas og dili lang ta moadto'g layo, dinhi mismo sa Sugbu, ang ubang mga coaches buhaton ang tanan aron lang gyud gani modaug. Tanang paagi gikan sa paghatag og dagkung talay sa mga players ug paggulat-gulat sa referee himoon aron lang gyud modaug ang iyang team.
Sa labing una niyang season isip baseball coach sa dakung unibersidad sa Champagne, Illinois, ang team ni Corlis nakaangkon og 0-38 nga win-loss record ug nianang pagkasunod tuig, mi-asenso kini ngadto sa 0-43 win-loss record.
Sa katapusan niyang season isip baseball coach, ang team ni Corlis nga wala' butangi og ngalan kun unsa, nakataghap ug mikulit sa una nilang kadaugan sa iskor, 9-0. Hilum ang tanang players nga miguwa gikan sa baseball field.
Apan si Corlis, daling mibiya pagka-coach. "I couldn't stand the pressure," mao ra gyud ang rason nga iyang gipasabot ngadto sa iyang mga anak.Sa huna-huna ni Corlis, ang iyang team wala maanad og daug. "Defeat they could handle -- winning was something else."
Mahimong tinunto kining estoryaha apan tinuod kini. Ug makigpusta ako nga walay coach nga makahimo niini kun dili si Corlis ra gyud.
* * *
Malipayon kaayo ang presidente sa University of San Carlos Basic Education Department-Parents Teachers Community Association, Inc. (USC BED-SC PTCA, Inc.) executive board nga si Dr. Hermes Ibon tungod kay niadtong Domingo, Oktobre 26 miabot na og 12 ka teams ang misalmot sa PTCA basketball tournament alang sa umaabot nga Family Day unya sa Disyembre.
Wala madayon ang torneyo sa miaging tuig tungod kay wala makaporma og team kay kuwang sab og kadasig ang nagpasiugda bisan kun gi-unsa og haylo ni Cesar Ortega.
Karong tuiga, among gipaninguha nga madayon gyud ang torneyo. Kining inyong higala maoy PIO sa executive board ug maoy natudlong chairman sa sports committee. Busa nagpusot-pusot ang akong mga suwat nga naghangyo sa mga ginikanan sa pagsalmot.
Maayo na lang gani kay mitabang kanako si Rey Macias ug abtik sab kaayong nanglista sa mga interesadong mosalmot si Rex Maribao. Salamat kaninyo, Brod.
* * *
Human sa duha ka semana, ato na gyud matagad kining mga pahalipay alang ngadto sa akong mga igsuon, pag-umangkon ug mga paryente. Kini mao sila si Gian Carlo Quindao (Oktobre 2), Flordelis Malagar Hatamosa (Oktobre 17), Grace Malagar (Oktobre 20) Gladys Malagar (Oktobre 24) ug Nene Quindao (Oktobre 30). Atong mga pag-ampo sa atong mahal sa kinabuhi sa milabay nga All Saint's Day and All Soul's Day. – BANAT NEWS